విజ్ఞానంతోనే వికసించు జగత్తు

రచన- గంటేడి గౌరునాయుడు   గానం – దివిజా కార్తీక్

సంగీతం – సాయి కార్తీక్      చిత్రీకరణ - నేను

విజ్ఞానంతోనే వికసించు జగత్తు

పసిపిల్లల చదువే దానికి విత్తు

లేగదూడ గంతులు పసిడి పూల కాంతులూ

గాలితరగ పిలుపులు సెలయేటి అలల మెరుపులు

ప్రకృతిలో అణువణువు పసిపిల్లల అమ్మవడి

ఆ ప్రేమను పంచాలి పిల్లలకు చదువుల బడి 
పిల్లలకు చదువుల బడి    విజ్ఞానంతోనే .......

చిన్నచిన్న చేతులతో మోయలేని బరువులతో

పసిపిల్లల మనసులో గాయాలై రగిలితే

ప్రమాదాల కోరలలో బాల్యం బలియైపోతే

బావిభారతి ఆశల బాల్యం ఇకెక్కడిది. 

బాల్యం ఇకెక్కడిది.     విజ్ఞానంతోనే ....... 

వ్యాపరం వలలో చదువు చేప కాకూడదు

కాసుల గాలానికి విజ్ఞానం బలికాకూడదు

తొలిపొద్దు పొడుపులా తొలకరి తొలిచినుకులా

పసిడిపంట పండాలి మన పాపల చదువు  

మన పాపల చదువు    విజ్ఞానంతోనే .......

దేశం ఏదైన కాలం ఏదైనా

చెప్పే చదువేదైనా బాల్యం ఒకటే

పూవు వంటి పసి ప్రాయం వసివాడి పోకుండా

కాపాడే బాధ్యత మన అందరిది,
 మన అందరిది   విజ్ఞానంతోనే .......  

పాఠమే పాటగా చదువే ఒక ఆటగా

గురువే విద్యార్థికి చక్కని నేస్తంగా

మనసుని మురిపిస్తే బాధను మరిపిస్తే

తరగతి గదులే రేపటి తరగని నిధులు 
తరగని నిధులు

విజ్ఞానంతోనే వికసించు జగత్తు

పసిపిల్లల చదువే దానికి విత్తు