Pages

19 July 2015

పురుగులు



భిన్న దృష్టికోణాల భేదాలు
అభిప్రాయాలను దాటి
ప్రిస్టేజీ పోరాటాలుగా
మలుపు తిరుగుతున్నప్పుడు,
దాడి, ప్రతిదాడి పర్వాల పర్వర్షన్లో
వదిలేస్తున్నదేందో
వంకర చూపునొదిలి తిన్నగానే
చూడడాన్ని నిజంగానే నేర్చుకోవాలి.

నచ్చడాలు, నచ్చకపోవడాలు
ఇష్టాయిష్టాలు
లాభనష్టాలు, కోపతాపాలు
వ్యక్తిగతాల నుంచి సామాజికాలుగా
మార్పుచెందుతున్నప్పుడు
మరో పరిణామ సిద్దాంతాన్ని
కొత్తగా కనుక్కోవాలి.

తొక్కబడ్డ శవాల
ఇంగితజ్ఞానాల అవగాహనల్లో
పదేపదే మునిగి తేలుతున్నప్పుడు
విలువల గురించి చింతించేవాడు
చర్వితచర్వణంగా చచ్చేచావులను
తప్పుకునే మార్గాలను వెతికిపట్టుకోవాలి.
లేకుంటే
సిద్దం చేసుకున్న సమాధుల్లో దూరి
జీవితాంతం తనతో  తానే మాట్లాడుకుంటూ

తనకు తానే ఓ కాలక్షేపమై మిగిలిపోవాలి.

17/7/2015

17 July 2015

పాతాళానికి ప్రయాణం

ఎ జర్నీ టు ది సెంటర్ ఆఫ్ ద ఎర్త్,. 


జూల్స్ వెర్న్,1864 లో ఫ్రెంచ్ లో రాసిన సైన్స్ ఫిక్షన్ నవల. చెన్నై ఐఐటిలో ఫ్రొఫెసర్ గా పనిచేస్తున్న శ్రీనివాస చక్రవర్తి , ఈ  సైఫై ( సైన్స్ ఫిక్షన్) క్లాసిక్ నవలను తెలుగు పాఠకులకు అందివ్వాలనే ఉద్దేశ్యంతో, ఈ పూర్తి నవలను తెలుగులో అనువదించారు. దీన్ని జనవిజ్ఞానవేదిక, మంచిపుస్తకం వారు ప్రచురించారు. ఇది వరకే ఈ పుస్తక సంక్షిప్త అనువాదాలు తెలుగులో వచ్చినప్పటికి, పూర్తి స్థాయి అనువాదంగా దీన్ని చెప్పుకున్నారు అనువాదకులు.  తెలుగులో ఇప్పటికి ఓ మంచి సైన్స్ ఫిక్షన్ నవలను మనం చూడలేదంటే అందులో అతిశయోక్తి ఏ మాత్రం లేదు. ఈ మంచి ప్రయత్నాన్ని అభినందిస్తూ, ఆసక్తికరంగా అనువదించిన ఈ నవలలోకి ఒక్కసారి తొంగిచూద్దాం.
ప్రధాన పాత్రలు - స్వభావాలు
1) ఫ్రొఫెసర్ ఒట్టో లీడెన్ బ్రాక్ కోపం, అసహనం, జ్ఞానం మూర్తిభవించి, ఏ పరిస్థితులకు చలించకుండా తాను అనుకున్నదానికి కట్టుబడే వ్యక్తి. ప్రముఖ శాస్త్రవేత్త, జియాలజిస్ట్.
2) ఏక్సెల్:  ఫ్రొఫెసర్ గారి (పెంపుడు) మేనల్లుడు, చాలా సాధారణమైన వ్యక్తి,  సాహసయాత్రల పట్ల విముఖత, చిన్న సమస్యలకే బెంబేలెత్తిపోతాడు, సున్నితుడు, గ్రౌబెన్ ప్రేమికుడు
3) హన్స్ బైకి:   ఐస్లాండ్ లో వీరి యాత్రకు  అత్యంత విధేయుడైన గైడ్, దృడచిత్తుడు,
4) గ్రౌబెన్ : ఫ్రొఫెసర్ గారి పెంపుడు కూతురు, ధైర్యస్తురాలు. ఏక్సెల్ ను యాత్రకు ఉత్తేజితుడిని చేసే ప్రయత్నం చేస్తుంది. ( పరిమితమైన పాత్ర)

జర్మనీలోని హాంబర్గ్ పట్టణలో మే, 14, 1863 లో ఈ కథ మొదలవుతుంది, ఆగస్ట్ 29,30(?)ఇటలీలోని చిన్న ద్వీపమైన స్ట్రాంబోలిలో ముగుస్తుంది.

 ఈ వైజ్ఞానిక సాహస యాత్ర  ఆనాటికి ప్రసిద్ధమైన అనేక సాంకేతిక, భౌగోళిక అంశాలను ప్రమాణికంగా తీసుకొని ముందుకు సాగుతుంది.
ఈ నవలంతా ఏక్సెల్  తన మాటల్లో చెప్పుకుంటు పోతుంటాడు, సంక్షిప్తంగా కథ ఇలా సాగుతుంది.

ప్రొఫెసర్ గారు కొన్న ఓ పాతపుస్తకంలో  16వశతాబ్థానికి చెందిన ఐస్లాండ్ ఆల్కెమిస్ట్, పండితుడు ఆర్నే సాక్నుసెం రూనిక్ భాష లో రాసి  వున్న చిన్నసంకేత ప్రాచీన రాతప్రతి దొరుకుతుంది ( మే 14).

 దానిలో ఐస్లాండ్ లోని నిద్రాణస్థితిలోని స్నెఫెల్ అగ్నిపర్వత ముఖద్వారం నుంచి భూమి మధ్య భాగానికి దారివుంది అని వుంటుందని  డీకోడ్ చేస్తారు. ఇక ఫ్రొఫెసర్ గారు వెంటనే ఏక్సెల్ ను వెంట తీసుకొని (మే16)  ఐస్లాండ్ బయలుదేరతారు.  హాంబర్గ్ నుండి కేల్ వరకు రైల్లో, అక్కడ నుండి కొపెనహెగన్( డెన్మార్క రాజధాని) కు ఎల్నోరా ఓడలో వెళ్తారు.ఓ వారం విడిది అనంతరం జూన్ 2వ తేది  వల్కీరా అనే ఓడలో స్కాట్లాండ్, ఫారోస్ దీవుల మీదుగా 13తేదికి ఐస్లాండ్ రాజధాని రిజోవిక్ కు, చేరుకుంటారు. 

 స్థానిక ఫ్రోఫెసర్ ఫ్రెడరిక్సన్ వీరికి అతిధ్యం ఇచ్చి, హన్స్ అనే వేటగాడిని, ఈ యాత్రకు మార్గదర్శకుడిగా కొంత జీతానికి కుదిరిస్తాడు.
జూన్ 16వ తేది, రిజోవిక్ నుంచి దాదాపు 250 కిలోమీటర్ల దూరంలోని స్నెఫెల్ అగ్నిపర్వతం వద్దకు ప్రయాణం మొదలుపెడతారు. మరో ఇద్దరి సహాయకులను తీసుకుని గుర్రాల సహాయంతో నడుచుకుంటూ, గర్దార్, స్టాపీ అనే ఊర్లమీదుగా స్నెఫల్ పర్వతాన్ని అధిరోహించి, జూన్ 25 నాటికి, ఆ అగ్ని పర్వత బిలం వద్దకు చేరుకుంటారు.

ఇక, సహాయకులు వెనుతిరిగిన తరువాత, ఈ ముగ్గురు ఆ బిలం నుంచి పాతాళానికి అవరోహణ సాగిస్తారు.

 కొన్ని సార్లు దార్లు తప్పుతూ, మంచినీటికై అలమటిస్తూ, బయటపడతామో లేదో తెలియని చిత్రవిచిత్ర పరిస్థితుల్లో ఆ కాలానికి పాచుర్యంలో వున్న వివిధ సిద్దాంతాలను చర్చించుకుంటూ, భూగర్భంలోని సముద్రాలను, జీవరాశుల్ని సంభ్రమాశ్చార్యాలతో చూసుకుంటూ అనేక సాహసల అనంతరం చివరకు అదృష్టవశాత్తూ,  మధ్యధరా సముద్రంలోని స్ట్రాంబోలి అనే దీవిలో వున్న ఓ అగ్నిపర్వతం ద్వారా బయటకు విసిరివేయబడతారు.

 



వీరు భూకేంద్రానికి వెళ్లారో లేదో చెప్పలేదు కాని, ఆద్వంతం ఆసక్తిని రేకేత్తిస్తూ, విజ్ఞాన శాస్త్ర విషయాలను చర్చిస్తూ నడిచే కథా,కథనం పిల్లల్నే కాదు, పెద్దలను కూడా ఆకట్టుకుంటుందని చెప్పవచ్చు. సైఫై నవలల్లో గొప్పగా కీర్తించబడే ఈ నవల అనేక సినిమాలకు,
 సాహసయాత్రలకు  స్పూర్తిగా నిలిచింది.
234పేజీలు, 110 రూపాయల వెలతో వున్న ఈ పుస్తకం ఫస్ట్ రీడింగ్ టైమ్ 2నుంచి 3గంటలు. ఈ పుస్తకం కావలసినవారు సంప్రదించాల్సిన చిరునామా
 జనవిజ్ఞానవేదిక, జి.మాల్యాద్రి, 162, విజయలక్ష్మీనగర్,నెల్లూరు - 524004,ఫోన్. 9440503061.
(లేదా) మంచిపుస్తకం, 12-13-439, వీథినెం.1, తార్నాక, సికింద్రాబాద్- 500017 ఫోన్ .9490746614.
ఏవైనా గవర్నమెంట్ పాఠశాలలు అనువాదకులు వి. శ్రీనివాస్ చక్రవర్తిగారిని సంప్రదిస్తే,. స్కూల్ లైబ్రరీ ప్రాజెక్ట్ లో భాగంగా ఈ పుస్తకంతో పాటు మరికొన్ని పుస్తకాలను ఉచితంగా పంపుతున్నారు. వారి బ్లాగ్  లింక్  ఇది.
పాతాళానికి ప్రయాణం వారి బ్లాగ్లో కూడా చదవచ్చు, దాని లింక్

ఈ బుక్ కావాలనుకుంటే కినిగే లింక్

7 July 2015

|| సూచన||



హేయ్,
ఆలోచన  అదృష్టం కాదు,
అనర్థమని
నెత్తినోరు కొట్టుకుంటుంటే,

అర్థంలేని
బండ బతుకని
హేళనచేశావ్ కదా!

చుట్టుకుపోయిన
ఆక్టోపస్ చేతుల్లాంటి ఆలోచనల మధ్య
బిగసుకుపోయిన మెదడునాళాల వేదన సాక్షిగా
ఇప్పుడైన ఒప్పుకుంటావా!

అంతా అయిపోయాక
తీరుబడిలో తప్పోప్పుల పట్టికేసుకుంటే
అదింకో తెగని ఆలోచన కదా!

అందెందుకు గాని ఇంకా
నడువ్, ఇపుడైనా కాస్తంత నిరాలోచనగా.


24/6/15

6 July 2015

మన చుట్టూ వుండే పదార్థం ( 1 యూనిట్ నోట్స్ ) 9వ తరగతి బౌరశా

కొంత ద్రవ్యరాశిని కలిగి వుండి,
స్థలాన్ని ఆక్రమించే దేనినైనా పదార్థం అంటారు.
పదార్థం మూడు స్థితులలో లభిస్తుంది.
1) ఘణ స్థితి 2) ద్రవస్థితి 3) వాయు స్థితి
ఆకారం, ఘణ పరిమాణం, సంపీడ్యత, వ్యాపనం అనేవి పదార్థాల యొక్క కొన్ని ముఖ్యమైన ధర్మాలు.

ఆకారం
ఘణపదార్థాలు నిర్థిష్టమైన ఆకారాన్ని కలిగివుంటాయి.
ద్రవపదార్థాలు వాటిని నిల్వచేసే పాత్రలరూపాన్ని బట్టి వాటి ఆకారాలను మార్చుకుంటాయి.
వాయువులు ఆకారాన్ని కలిగివుండవు.
ద్రవాలు, వాయువులు ఒక చోటు నుంచి మరొక చోటుకి సులభంగా ప్రవహిస్తాయి. అందుకే వాటిని ప్రవాహులు అని అంటారు.

ఘణపరిమాణం
ఘణ మరియు ద్రవ పదార్థాలు నిర్థిష్ట ఘణపరిమాణాన్ని కలిగివుంటాయి.
వాయు పదార్థాలకు నిర్థిష్ట ఘణపరిమాణం వుండదు.

సంపీడ్యత
ఘణ, ద్రవ పదార్థాలతో పోల్చినప్పుడు వాయువులు ఎక్కువ సంపీడ్యతను పొందుతాయి. అందువలననే LPG, CNG గ్యాస్ సిలిండర్లలో అత్యధిక పీడనంతో, ఎక్కువ వాయువును నిల్వచేస్తారు.
CNG ( COMPRESSED NATURAL GAS) సంపీడిత సహజవాయువు.
LPG(LIQID PETROLIUM GAS) ద్రవ పెట్రోలియం వాయువు.
వ్యాపనం
* ఒక పదార్థం మరొక పదార్థంలో కలిసే ప్రక్రియను వ్యాపనం అంటారు.
పదార్థ స్వభావం పై ఆధారపడి వ్యాపనం ఏ స్థితిలోనైనా జరుగుతుంది.
వ్యాపనం యొక్క వేగాన్ని వ్యాపనరేటు అంటారు..వాయువుల యొక్క వ్యాపనరేటు చాల ఎక్కువగా వుంటుది.
ఆక్సిజన్  రక్తంలోకి,నీటిలోకి వ్యాపనం చెందడం వల్ల జంతువులు, చేపలు లాంటివి జీవించగలుగుతున్నాయి. కూల్ డ్రింక్స్, సోడాలలో కార్బన్ డై ఆక్సైడ్ వ్యాపనం చెందిస్తారు.

పదార్థం చిన్నచిన్న అణువులతో ఏర్పడుతుంది.
ఈ కణాల మధ్య ఆకర్షణ బలాలు వుంటాయి. పదార్థాన్ని బట్టి, పదార్థ స్థితిని బట్టి ఈ ఆకర్షణ  బలాలు మారుతూ వుంటాయి.
ఈ కణాల మధ్య కొంత ఖాళీ స్థలం వుంటుంది. ఘణ, ద్రవ, వాయు పదార్థాలలోని అణువుల అమరిక ఇలా వుంటుంది.


పదార్థాల స్థితి మార్పు.
పదార్థాలు ఒక స్థితినుండి మరొక స్థితికి మారుతాయి.
ఇది ఉష్ణోగ్రత మరియు పీడనం అనే అంశాలపై ఆధారపడి వుంటుంది.

ఉష్ణోగ్రతా మానాలు.
ఒక పదార్థం యొక్క వెచ్చదనం లేదా చల్లదనం స్థాయినే ఉష్టోగ్రతా అంటారు. ఉష్ణోగ్రతను ప్రధానంగా సెంటిగ్రేడ్ మరియు కెల్విన్ మానాలలో కొలుస్తారు. ఏదైనా ఉష్ణోగ్రతను సెంటిగ్రేడ్ మానం నుండి కెల్విన్ మానంలోకి మార్చాలంటే 273 ను కూడాలి.
ఉదా: 0 o C =  0 + 273 = 273 o K
ఏదైనా ఒక ఉష్ణోగ్రతను కెల్విన్ మానం నుంచి సెంటిగ్రేడ్ మానంలోకి మార్చాలంటే 273ను తీసివేయాలి.
 ఉదా : 0 o K =  0 - 273 =  -273 o C
ద్రవీభవన స్థానం
ఏ నిర్థిష్ట ఉష్ణోగ్రత వద్ద ఘణపదార్థాలు, ద్రవ స్థితికి మారుతాయో, ఆ ఉష్ణోగ్రతను దాని యొక్క ద్రవీభవన స్థానం అంటారు.
మంచు యొక్క ద్రవీభవన స్థానం 0 C   or  273K
మరుగు స్థానం
ఒక నిర్థిష్ట ఉష్ణోగ్రత వద్ద ద్రవపదార్థాలు వాయు రూపంలోకి మారుతాయి.
ఆ ఉష్ణోగ్రతనే వాటి మరుగు స్థానం అంటారు.
నీటి యొక్క మరుగుస్థానం 100C or  373
ఒక పదార్థం యొక్క ద్రవీభవన, మరుగుస్థానాలు దానిలోని కణాల మధ్యగల ఆకర్షణ బలాల మీద ఆధారపడి వుంటాయి. 
కణాల మధ్య ఆకర్షణబలాలు ఎక్కువగా వుంటే ఆ పదార్థాల ద్రవీభవన, మరుగుస్థానాలు ఎక్కువగా వుంటాయి.
గుప్తోష్ణం
 ఒక స్థిర ఉష్ణోగ్రత వద్ద కేవలం స్థితి మార్పు కోసం ఒక పదార్థం గ్రహించే లేదా విడుదల చేసే ఉష్ణశక్తినే గుప్తోష్ణం అంటారు.
దీనిని L అనే అక్షరంతో సూచిస్తారు.

ఉత్పతనం 
వేడి చేసినప్పుడు కొన్ని పదార్థాలు ఘణస్థితి నుండి వాయుస్థితికి చేరుకుంటాయి. ఈ ప్రక్రియనే ఉత్పతనము అంటారు.
దీనికి ఉదాహరణ అయోడిన్

ఘణస్థితిలో వున్న కార్భన్ డై ఆక్సైడ్ ను పొడిమంచు అంటారు. సాథారణ వాతావరణ పీడనం వద్ద ఇది సులభంగా వాయురూపంలోకి మారిపోతుంది.
భాష్పీభవనం ( ఇగరడం)
ద్రవ అణువులు ఏ ఉష్ణోగ్రత వద్దనైనా ద్రవ ఉపరితలాన్ని వీడిపోయే ప్రక్రియను భాష్పీభవనం అంటారు.
ఇది ఉపరితల ప్రక్రియ.
ఇది శీతలీకరణ ప్రక్రియ.
ఇది ఏ ఉష్ణోగ్రత వద్దనైనా జరుగుతుంది.
ఒక ద్రవం యొక్క భాష్పీభవన రేటు , ఆ ద్రవ ఉపరితల వైశాల్యం , ఉష్ణోగ్రత, గాలిలోని ఆర్థ్రత, గాలివేగం వంటి అంశాలపై ఆధారపడుతుంది.
నిత్యజీవితంలో భాష్పీభవనం
చెమట ఆవిరైటప్పుడు మన శరీర ఉష్ణోగ్రత తగ్గి చల్లగా అనిపిస్తింది.
కుండలోని నీరు చల్లగా కావడం.
కుక్కలు నాలుకను బయటకు వుంచడం ద్వారా వాటి శరీర ఉష్ణోగ్రతను తగ్గించుకుంటాయి.
బర్రెలు, గేదెలు, పందులు లాంటి జంతువులు బురదపూసుకోవడం, నీటిలో మునగడం ద్వారా వాటి శరీర ఉష్ణోగ్రతను క్రమబద్దీకరించుకుంటాయి.
( ఇది తెలుగు మీడియం విద్యార్థులకోసం, అవసరమైన వారు నిరభ్యంతరంగా కాపీ చేసుకోవచ్చు)
( ఏమైనా మార్పులు చేర్పులు వుంటే సూచించగలరు)


5 July 2015

బేకారీలు

( ఇవి కేవలం సరదాకి మాత్రమేఎవరిని ఉద్ధేశించినవి కావు) 
చిన్నకవులనుంచి పెద్ద కవులదాక
ఎక్కడెక్కడ చూడు కాఫీకేట్లందరు
కవుల క్రింది నలుపు కవులకే తెలుసు
గురివింద హేళి,  e కవుల కేళి.
పాదవ్యర్థాలు :కాఫీకేట్లు = కాపీ కొట్టెే కేటుగాళ్లు

4/6/15

బేకారీలు
ఎక్కడెక్కెడో రగిలి
లోపలంతా కాల్తే కాని
కవితా మంట ఎగసిపడదంటూ,
ఉక్రోఖ్యానం మొదలెట్టానో లేదో,

బాగా కాలి,
బూడిదయ్యాక చెప్పు
అప్పుడొస్తా,
అంటూ ఉడాయించాడు, వాడు.
ఫుట్ నోట్స్* ఉక్రోఖ్యానం ఉక్రోషంతో కూడిన వ్యాఖ్యానం
3/7/15
బేకారీలు
తనడుగుతుంది
నీవు రాసే ప్రతి అక్షరంలో
కనిపిస్తున్నది ,
నేనే కదా అని.

నిజానికి అబద్దానికి మధ్య
మౌనంగా నేను .
1/7/15

బేకారీలు

కాళ్లు నాకుతూ
కూర్చుంటాయేంతసేపైన
బొచ్చెలో వేసే బొమికల కోసం.

మొరుగుడంతా
ఎదుటి ముఖాల పైనే.

అంతకంటే  ఆశించకు
పెంపుడు కుక్కలవి.

గుర్తు చేసి బాధించకు
కోల్పోయిన జీవితాన్ని.
30/6/15
బేకారీలు
గోడకు కొట్టిన పిడకైనా
కాలానికి ఎండి రాలిపోయాక
ఇంధనమై మండుతుంది.

కవిత్వానికి కరుచుకుపోయాక
కుళ్లిపోతారు అక్కడే
కవులెందుకో.
26/6/15

బేకారీలు
పేరు, పోయమ్స్ లో
ప్రాధాన్యత దేనికిస్తావ్ అని
మళ్లి అడిగాడతను.

కీర్తీ, కవిత్వంలో
ప్రాధాన్యత దేనికిస్తావ్
 అని మళ్లీ అడిగాడతను.

ఖ్యాతి/ పేరు కోసం వేసే
కుక్క బిస్కత్తులు
కవితలని
ఎలా చెప్పను.

బేకారీలు
అతనన్నాడు
తల ఎత్తకు
తగ్గి, తగ్గి, తగ్గితేనే గెలవగలవని.

నవ్వొస్తుంది

చచ్చాక గెలుపెందుకని.

అబార్టెడ్



సందేహపు స్పర్శలతో
చలికాలపు నెగడై
కోరికలను రగిలిస్తుంది
రూపుదిద్దని వాక్యమొకటి.

అక్షరాల కుప్పల మధ్య
తొలియవ్వన రసతీవ్రత
లోపించిన లిటరేచర్
శృంగభంగమై రొప్పుతుంది.

నలగని దుప్పటి చితిపై
దుఃఖ యజ్ఞపు సమిధై
ఫలించని వాక్యరోదన
కవన విషాదమై పుష్పిస్తుంది.
5/6/15

2 July 2015

నాన్సెన్స్



ఒక అర్థరాత్రి
పలచటి వెలుతురు లాంటి మెలకువలో
కనురెప్పలపై  పెదవుల బరువుతో
తెరవబడని కనుల బాధ,
తెలుసో లేదో నీకు.

వెంటాడే నీడలాంటి గాయంలో
ఘాటైన కారం లాంటి వాక్యపు రుచి
ఎరుగుదువో లేదో నువ్వు.

మూతులపై ముచ్చటగా
విరబూసే నవ్వుల మతలబులో
రహస్య విషాద
విష లోకపు తీరని దిగుల్లు
ఓదార్చే గుండె తడిని
స్పర్శించావో లేదో నువ్వు.