Pages

31 December 2012

చివరి తొక్కలు,,.ఈ సంవత్సరానికి,...happy new year,.


(1)
మూర్ఖత్వమే బలం - జ్ఞానమే బలహీనత.
(2)
తన మేధస్సుకి ముగ్ధుడై,
సంశయాన్ని,ఆలోచనను, ప్రశ్నను పక్కకునెట్టి,
సమర్ధించుకోవడం మొదలవుతుందో,
ఆ క్షణం ఒక మూర్ఖమేధావిని సృష్టిస్తుంది,.
(3)
అజ్ఞానం జోకొట్టి నిద్రపుచ్చింది,
అరాకొర జ్ఞానం గిచ్చిగిచ్చి ఏడిపిస్తుంది,..
(4)
సంతృప్తి నరకంలో నవ్వుతుందని,
అసంతృప్తి స్వర్గంలో పొల్లిపొల్లి ఏడుస్తుంది,.
 (5)
జ్ఞానానికి అజ్ఞానానికి మధ్య,
కొన్ని ప్రశ్నలుంటాయ్,
ఎంతటి జ్ఞానికైనా కొన్ని ప్రశ్నలు మిగిలేవుంటాయ్,..
(6)
జ్ఞానం అజ్ఞానం ఒకే నాణెం కు రెండు ముఖాలు.
(7)
నేను మూర్ఖుణ్ణి అని తెలుసుకోవడానికి

 కొద్దిపాటి జ్ఞానం చాలు,

నేను జ్ఞానిని అని చెప్పుకోవడానికి

  చాల మూర్ఖత్వం కావాలి.
(8) 
మూర్ఖత్వం  జ్ఞానానికి వత్తి లాంటిది.
(9)
జ్ఞానానికి చివరిమెట్టు మళ్ళీ అజ్ఞానమే.





29 December 2012

కూర్గ్ - మడికేరి


కూర్గ్ అందాలని చూద్దామని మొత్తం మీద ఫిక్స్ అయిపోయి,.,.డిసెంబర్ 16 రాత్రి బెంగుళూరు బస్  ఎక్కి మా యాత్రను ప్రారంభించేసాము,17 రాత్రి బెంగుళూరులో బయలుదేరి 18 ఉదయం 5.30 కల్లా మడికెరి చేరుకున్నాము.,
మొదటి రోజు చూసిన ప్రాంతాలు,.
ఓంకారేశ్వరస్వామి దేవాలయం
రాజా సీట్
మడికెరి కోట
రెండవ రోజు
భాగమండలేశ్వర స్వామి దేవాలయం
తల కావేరి
బ్రహ్మగిరి శిఖరం (అక్కడనుంచి తీసిన ఫోటో)
అబ్బే జలపాతం,
 రాజుల సమాధులు,.
మూడవ రోజు 
కావేరి నిసర్గధామ
బైలు కుప్పే బంగారు దేవాలయం
దుబేరా ఏనుగుల శిక్షణాకేంద్రం( ఫోటో నేను తీసింది  కాదు)
.ఓంకారేశ్వర స్వామి దేవాలయం,.
నాలుగవ రోజు 
మైసూర్ జూ
 చాముండేశ్వరి దేవాలయం,
ఐదవరోజు
 శ్రీరంగ పట్టణం,
.మైసూర్ మహారాజ ప్యాలస్
ఆరవరోజు బెంగుళూరు ఫీనిక్స్ షాపింగ్ మాల్,
(గూగుల్ నుండి తీసుకున్న ఫోటో)
అలా తిరిగి తిరిగి 25 వ తేది ఉదయానికి ఇంటికి చేరుకున్నామన్నమాట, 

13 December 2012

హైకూలు - ఒక పరిచయం


హైకు అనేది జపాన్ దేశపు,సాంప్రదాయ కవిత్వంలో ఒక భాగం,.వీటికి ఆధారంగా నిలిచింది, జెన్ (ధ్యాన)బౌద్ధం.
హైకూలలో మూడు పాదాలు (కిరు,కైరేజి,కిగో)
వుంటాయి,కిగో అంటే ఋతువునో,కాలాన్నో సూచించడం,.మిగతావి రెండు దృశ్యాలనో,అనుభూతులనో కలిపేవి,
అక్షరాల (((((((--- పరిమితి 17 (5-7-5)
జెన్ బౌద్దం ప్రకారం మనిషిలో వుండే చిత్తలక్షణాలు 17,అందుకే విస్తీర్ణం అంతవరకే పరిమితం.
కేవలం ప్రకృతి వర్ణన మాత్రమే వుండాలి, వర్తమానంలోనే చెప్పాలి,. అలంకారాలు, ఆడంబరమైన భాషకు చోటులేదు,కవి తన అభిప్రాయాన్ని చొప్పించకూడదు,ఇది కేవలం ఒక దృశ్యాన్ని పాఠకుడి ముందు వుంచాలి,ఇలా చాలా నియమాలతో వుంటుంది,సాంప్రదాయ హైకు,.
నిజానికిది చాలా సులభంగా కనిపించే కష్టమైన ప్రక్రియగా చెప్పుకోవచ్చు,.
fu-ru-i-ke ya (5)
ka-wa-zu to-bi-ko-mu (7)
mi-zu no o-to (5)
పాత తటాకం,
ఒక కప్ప దూకింది,
నీటి శబ్ధాలు.

ఇది హైకూలకు ఆద్యుడుగా భావించబడే బషో (1644-1694) రాసిన హైకూ.
తెలుగులో మొట్టమొదటి సారి హైకూలను రాసిన కవిగా గాలి నాసర్ రెడ్డి గారిని చెప్పుకోవచ్చు, 17 అక్షరాల నియమం పాటించిన కవి బహుశా ఈయనోక్కరే,వీరు రాసిన హైకూలు చాలా తక్కువ.వారి హైకు ఒకటి,
ఎండుకొమ్మపై,
ఒంటరిగా ఓ కాకి,
శిశిర సంధ్య,.
అమెరికాలో హైకూలు 1950నుంచి విస్తృతమైన ప్రచారంలో వున్నాయి,కానీ అక్కడ అక్షరనియమం పాటించబడటం లేదు,.కొంత మంది కవులు ఒక్క పాదంలో, రెండుపాదాలలో కూడా హైకూలు రాస్తున్నారిప్పుడు,.గోపి గారి మాటలలో చెప్పాలంటే,హైకూస్నాప్ షాట్ లాగా, ఫోటోగ్రాఫిక్ గా వుంటుంది,.సగటు శ్రోతకు దీనిలో కదలక కనిపించదని ,పాఠకుడు కవితో పాటు సమభావకుడు అయినప్పుడు మాత్రమే  హైకు ప్రకాశవంతమపుతుందని ,ఇవి తాత్వికత, ప్రకృతితో తాదాత్మ్యం లాంటి   మౌనవస్తువులకు సరిపోతుంతని ,ఆయన భావించారు,.. అందుకేనేమో నానీల బాట పట్టారు,..ఇస్మాయిల్ గారి తెలుగు హైకూలను ప్రతిభావంతంగా రాశారు, వారి హైకూలు కొన్ని,.

**కొలను లోకి రాయి విసిరారెవరో*
అలలు ఇ౦కా వ్యాపిస్తూనే ఉన్నాయి
రాయేదీ

ఎవరికోస౦ వర్షిస్తాయి మేఘాలు
పిల్లల కోస౦ కాకపోతే
గొడుగులడ్డు పెట్టుకునే వాళ్ళకోసమా?

ము౦దు మనస్సునీ
ఆ వెనక గదినీ
తర్వాత విశ్వాన్నీ ఆవరి౦చి౦ది చీకటి.

పెన్నా శివరామకృష్ణ గారి హైకూలు కొన్ని,...

సాయంత్రం వానజల్లు
చీకటిని దిగబెట్టి
వెళ్లిపోయింది,.

పక్షి నోటిలో
గడ్డి పరకలు
ఇల్లు మారుతున్నదేమో.,.

సుడిగాలి,
కొమ్మను ఊపుతున్నాని,
పిట్ట గర్విస్తుంది,.

బివివి ప్రసాద్ గారి హైకూలు కొన్ని,.....

చేయి పట్టుకొంది నిద్రలో
పాప కలలోకి
ఎలా వెళ్ళను

పిట్టలు కూస్తున్నాయి 
గాలి నిండా
రంగుల శబ్దాలు

దూరంగా దీపం 
దానిని కాపాడుతూ 
అంతులేని చీకటి

తెలుగులో ఈ మధ్యకాలందాకా వచ్చిన హైకూ సంకలనాల వివరాలు కొన్ని,.
రహస్య ద్వారం ( పెన్నా శివరామకృష్ణ,1991)
కప్పల నిశ్శబ్థం (ఇస్మాయిల్,1997)
దృశ్యాదృశ్యం (బివివి ప్రసాద్1995)
హైకూ(బివివి ప్రసాద్1997)
పూలు రాలాయి(బివివి ప్రసాద్1999)
హైకూ చిత్రాలు (సూర్యభాస్కర్,1997)
ఆకాశదీపాలు ( లలితానంద్,1997)
సీతాకోక చిలకలు(శిరీషా,1997)
చినుకుల చిత్రాలు( పెన్నా శివరామకృష్ణ,2000)
ఇంకా చాలానే వచ్చినట్లున్నాయి,..

9 December 2012

ప్రపంచ తెలుగు బ్లాగుల దినోత్సవ శుభాకాంక్షలు


ప్రపంచ తెలుగు బ్లాగుల దినోత్సవం సందర్భంగా బ్లాగర్లందరికి శుభాభినందనలు,..

అందరికి మరోసారి మన బ్లాగుల గీతాన్ని, బ్లాగుల ప్రతిజ్ఞను గుర్తుచేద్దామని వాటిని పోస్ట్ చేస్తున్నాను.

బ్లాగు ప్రతిజ్ఞ
బ్లాగులే నా కలల ప్రపంచం, బ్లాగర్లందరు నా స్నేహితులు.
నేను నా  బ్లాగును ప్రేమించుచున్నాను.
సుసంపన్నమైన నా ఊహాశక్తి,
బహువిధమైన నా రచనాశక్తి నాకు గర్వకారణం.
విభిన్నంగా, విలక్షణంగా, కీర్తివంతంగా
నా బ్లాగ్ ను తీర్చిదిద్దడానికి సర్వదా నేను కృషి చేస్తాను.
గూగుల్, వర్డ ప్రెస్, అగ్రిగేటర్లు, సీనియర్ బ్లాగర్లందరిని నేను గౌరవిస్తాను. ప్రతి బ్లాగర్ తోను మర్యాదగా నడుచుకొంటాను.
తోటి బ్లాగుల పట్ల అభిమానంతో ఉంటానని,
చదివిన ప్రతి టపాకు వీలైనంతవరకు సహృదయ వాఖ్యలు చేస్తానని, ఎన్ని కష్టాలెదురైనా, ఎన్ని నష్టాలొచ్చినా టపాలు రాస్తూనే వుంటానని ప్రతిజ్ఞ చేస్తున్నాను.
తెలుగు బ్లాగుల శ్రేయోభివృద్దులే నా ఆనందానికి మూలము.
సూచనలు
1. ప్రతిరోజూ బ్లాగు తెరిచేముందు బ్లాగు ప్రతిజ్ఞ చేయాలి.

2. పూర్తిగా చేయలేని పక్షంలో, చివరి వాఖ్యం చాలు.
---------------------------------------------------------------------
తెలుగు బ్లాగుల గీతం 
మా బ్లాగులమ్మకు లక్ష పూలాజల్లు
మన తెలుగు బ్లాగుకు నీరాజనాలు.
తెలుగు బ్లాగుల వృధ్ది  - మన భాష అభివృధ్ది
మనందరీ బుద్ది కదలాలి అటు కొద్ది.
                                                        మా బ్లాగులమ్మకు...
ఎక్కడెక్కడి తెలుగు ఇచటికే పరుగు
మన భాష వెలుగు బ్లాగులతో పెరుగు.
చిన్నప్పటి కథలు పెద్దవారి వెతలు
అనుభవపు పాఠాలు చిలిపి ఆరాటాలు
అన్నిటిని ఇక్కడే వెతుకుతాము
ఎన్నెన్నో విషయాలు హత్తుకొని వెళ్తాము
                                                                 మా బ్లాగులమ్మకు...
బెల్జియం బెజవాడ ఇంగ్లాండు, గుడివాడ
అమెరికా, మెక్సికో దుబాయి,ముంబాయి
సఖినేటిపల్లి ఆఫ్రికాలో పల్లి
కలకత్త, కనిగిరి ఎచ్చోట మేమున్నా
                                                           మా బ్లాగులమ్మకు...
కలల ఊహల ఊట సాహిత్య పూతోట
భావాల జడివాన - కురిసేను ఇచ్చోట
ఆకట్టు పోస్టులు - అలరించు కామెంట్లు
ఈ బ్లాగులా పంట - పండాలి ప్రతి ఇంట
                                                        మా బ్లాగులమ్మకు...
అపురూప కవితలు , చక్కని చిత్రాలు
సినిమాలు, గీతాలు, రాజకీయాలెన్నో
కళలు, విజ్ఞానాలు, కమనీయ విషయాలు
యాత్రవిశేషాలు, విశ్లేషణలు ఎన్నో
                                                         మా బ్లాగులమ్మకు...
తెలుగు భాషా శక్తి - బ్లాగర్ల ధీయుక్తి
విశ్వమంతా ఎగురు - తెలుగు బ్లాగుల కీర్తి
ఈ జీవితం మొత్తమూ ,ఇక బ్లాగులకే అంకితం
బ్లాగులే దైవమూ, బ్లాగులే మా ప్రాణమూ 

జై బ్లాగులమ్మ జై బ్లాగులమ్మ జైబ్లాగులమ్మ

సూచనలు
1. ప్రతి బ్లాగర్ల సమావేశం లో ప్రార్థనా గీతంగా పాడుకోవాలి.

2.తెలుగు బ్లాగుల గీతాన్ని గౌరవించి, ప్రచారం చేయాలి.

3. ఏ ఇద్దరు బ్లాగర్లు కలసినా జై బ్లాగులమ్మ అని అరుచుకోని, అభివాదం చేసుకోవాలి.