ఓ రెండు మంచి కవితలు

పి.రామకృష్ణ // ఎప్పట్లాగే

గుప్పెడు గింజల్నీ,
గిన్నెడు నీళ్ళనీ-

పిట్టగోడపై వుంచి

ఎదురుచూస్తున్నాను.

చెట్లను వెతుక్కుంటూ-

ఈ పక్షులన్నీ

ఎక్కడికి వెళ్ళాయో?

** ** **

ఎప్పట్లాగే

గుప్పెడు గింజల్ని చల్లి,

వాటిమీద-

గిన్నెడు నీళ్ళను పోసాను.

నాకు తెలుసు

పిట్టల కోసం వెతుక్కుంటూ

ఈ చెట్టు

ఎక్కడికీ వెళ్ళదు.

-------------------------------------------

పి.రామకృష్ణ // భగవాన్ ఉవాచ

2. ఆ ఆదివారపు మధ్యాహ్నం

ఓ చిన్నారి కోడిపిల్ల

అమ్మకోసం వెతుకుతూ, వెతుకుతూ.. 

దార్లో-

కారు టైరు క్రిందపడి, 

చనిపోయింది.

1. అదే ఆదివారపు ఉదయం

తల్లికోడి-

కసాయి కత్తిక్రింద కంఠాన్ని వుంచి,

కళ్లు మూసుకుని, ఇలా ప్రార్థించింది.

"భగవంతుడా ఇలాంటి చావు-

నా బిడ్డకు రాకుండా చూడు" అని.

----------------------------------------------------

నెల్లూరు కి చెందిన పి. రామకృష్ణ రాసిన ఈ రెండు కవితలు చిన్న చిన్న పదాలలో బోలెడంత తాత్వికతను దాచుకున్నాయనిపించింది ,నాకు నచ్చాయి. కవిసంగమం లో ప్రచురించబడిన ఈ కవితలు మీ కోసం నా బ్లాగ్ లో....